Судалгааг ахалсан Жулия Понграцийн хэлснээр Чингис хааны байлдан дагуулалд 40 сая хүн амь үрэгдсэн бөгөөд энэ нь агаар мандал дахь нүүрстөрөгчийн хийг 700 орчим сая тонноор багасгасан аж. Хэдэн арван сая хүн хэдхэн жилийн дотор үгүй болсон нь газар тариаланд ашиглагдаж байсан газруудыг эл хуль болгож, хүний гарт өртөж байсан олон ойг сэргээжээ. "Ой хөвч сүйдсэнээс болж агаар мандалд хуримтлагдаад байсан нүүрстөрөгчийний зөвхөн монголчуудын их байлдан дагууллын ачаар л багассан. 700 сая тонн нүүрстөрөгчийн хий гэдэг өнөөгийн дэлхий дахины бүтэн жил хэрэглэх шатахуунаас үүсэх хорт хийтэй тэнцэнэ” гэж Ж.Понграц ярьжээ.

Түүний тайлбарласнаар энэ нь хүний нөлөөлөлд байгаль орчин сэргэсэн түүхэн дэх цорын ганц тохиолдол гэнэ. Олон сая хүн дайн дажны хөлд амиа алдсан нь таатай зүйл биш тул агаар мандал дахь нүүрстөрөгчийн хий багассанаас дэлхий сэрүүн болсон гэх энэ онолыг шинжлэх ухаанчаар хүлээж авах хэрэгтэйг судалгааны багийнхан онцолжээ. Мөн өнөөгийн Оросын хойд нутаг зөвхөн энэ өөрчлөлтийн нөлөөгөөр л хүйтэн бүс нутаг болж, Европын ихэнх хэсэг ойтой болсон байх магадлалтай гэнэ.

Сэргэн мандалтынхаа оргил үед дэлхийн хуурай газрын 22 хувийг байлдан дагуулсан Их Монгол Улс 150 гаруй жилийн турш дэлхийн хамгийн хүчирхэг гүрэн байсан юм. Энэ гүрнийг байгуулах явцад амь үрэгдсэн хүний тоо Европын Хар үхэл, Хятадын Мин гүрний мөхөл, Америкийн эх газрын нээлт зэрэг түүхэн дэх цөөн чухал үйл явдлын үеэр амь үрэгдсэн хүний тоотой дөхнө.